गजल

मुर्झाएका फूलहरु झैं, लोलाउन मन लाग्छ
नबोल्ने तस्बिरहरुलाई,  बोलाउन मन लाग्छ!!

अचेत भएछु सायद, साथिहरु कोट्याउन थाले
देखाउन भएपनि थोरै, सल्बलाउन मन लाग्छ !!

हर रात मुर्छित लाग्छन्, हर सपनाहरु मरेपछि
अनिदा प्रहरहरुमा, बेस्सरी बर्बराउन मन लाग्छ!!

बिर्सिएछन् क्यार मुस्कुराउन, यी ओठहरुले पनि
एकान्तमा एक्लै ऎना सामु, टोलाउन मन लाग्छ!!

हैन केके खेल्छन् कुराहरु, मन मष्तिस्कमा आज
दुई-चार दिनलाई भए पनि, बहुलाउन मन लाग्छ!!

११ अप्रिल, २०१९
गिपुज्कोआ प्लाजा
डोनोस्टिआ 

मुक्तक

कहिले कम्प कहिले बाढी फेरि हावाहुरी,
प्रकृतिले चलायो यता लाग्ने चक्कु-छुरी,

सम्हालिन गारो भयो गाँसबासको पत्तो छैन,
राहत छैन सरकारको जहाजचढी कस्तो चुरिफुरी ?

हे दैब! नठग न बिन्ति गर्छु अनेक रुप तेरा,
हेर त ! न अन्न छ खाने न त ओत लाग्ने धुरी,

सोच्नुस यस्तो बेला मानबता हराउनु हुँदै हुन्न
सहयोग गर्ने मनका धनीलाई नमन मुरिमुरी ।।

रेबिकाजिलाई पठाएको मुक्तक

टिपन टापन

खडेरी होस या तुषारापात जीवन, फूलिरहोस हजुरको
शिशिर ऋतु धानकाबाला झैं सुख, झुलिरहोस हजुरको ।

कोईलीले गाईरहुन जिन्दगीका, ती हरेक सुख दुखहरु ।
बाधा अड्चन टाढै,समृद्धी नजिक डुलिरहोस हजुरको।

हरेक सपना,चाहना भावना सधै पूरा होइन यहि कामना
सफलतै सफलताले सदैब शिखर, चुमिरहोस हजुरको।

शब्दका नै किन नहुन मनदेखी नब बर्षको शुभकामना
सुनमा सुगन्ध उमङ्गमा सप्तरङ्ग, सदा घुलिरहोस हजुरको।

कठै बिस्कुनहरु

छरपस्ट छ बिस्कुन 

मन र मस्तिस्कका आङ्गन भरी 

सपनाहरुका बिस्कुन 

चाहनाहरुका बिस्कुन 

अब त अभ्यस्त भैसके 

खुला नयनहरु पनि

बिस्कुन टोलाउँदा टोलाउँदै  

बन्द मुलायम परेलीले

सम्झन छोडिसके  

फिंजारिएका बिस्कुन 

उठ्छन् या उठ्दैनन् 

या भुमरीमा पर्छन्

या चरिहरुले नै सकिदिन्छन्,

कठै बिस्कुनहरु !!