बिहानीका सिलसिलाहरु

1.
बिहानीका सिलसिलाहरु 
अविछिन्न गतिमा 
पिडाका पहाड हुन् या
सास्तीका सागर 
बिहानी सुन्दर लाग्छ 
आशाका किरणहरु संगै
नौला आयाम
सुनौला अनुभुतिहरु
पूर्बिका चिसा स्पर्शहरु
क्षितिज आफ्नो लाग्छ
छरिएका बादल आफ्नो लाग्छन्
हरेक निशामा प्यार भेटिन्छन्
सामुन्द्रिक छालका सर्साहाट
किनार चिलहरुका कल्याङ्गकुलुङ्ग
आफ्नै लाग्छन्
त्यसैले हरेक बिहानी संग
मित लगाउन मन लाग्छ
सिरेटाहरू संगै सुसेल्न मन लाग्छ
बिहानीलालीहरु संगै जिस्कन मन लाग्छ !!
मेरा बिहानीहरू !!

2,

एक बिहानी मेरो

सुन्दर बिहानीहरू
खुशी त यतै भेटिन्छन्
मिठा सपनाका त्यान्द्राहरुमा 
जब बिहानी आखा खुल्छन् !
सुर्योदय संगै चिरबिर आवाज
सुनौलो क्षितिज
मिठो चिसो आभास
सिरेटोको स्पर्श
कदम रोकिदैनन्
नजर रोकिंदैन
मिठा बेचैनीहरुमा
पाईलाहरु चल्न थाल्छन् !!
आजको एक बिहानी मेरो पनि
आशाका पाईलाहरु
विश्वाशका धरातलमा टहलिएका बेला
खुशीका धराहरु खोज्न निस्किन्छन्
अनि भेट्छन् मेरा नजरहरुले
सिताम्य पात,
मुस्कुराराउन खोजेका कोपिलाहरू
बतास संगै लहरिएका काँसका बुट्यानहरु
शरदले खाएको
जिन्ग्रिंग घाँसका तिल्काहरु
हो धेरै भेटिन्छन्
बिहानी हिंडाईं संगै
बेमतलबी अनुहारमा बटुवाहरु
खै के खोजेका हुन्
निमेसभर मुस्कान् छैनन्
र पनि खुशी भेट्छु मैले
नितान्त एक्लो हुन्छु
र पनि मिठास
अव्यक्त अनुभूतिहरु भेट्छु
बिहानी तिनै सिरेटहरुमा!
झन् झन् लोभ्याउछ मलाई
मेरा नजरका रहरहरुलाई
सागर माथि फैलिएका
बिहानी निशाहरुले
प्रतिबिम्बित बान्की परेका
सुरज किरणहरुले !
मन्त्रमुग्ध हुन्छु
म मेरा बिहानीहरुमा !!