तस्बिरहरुमा

खै के भेट्छु भेट्छु मैले, उनका तस्बिरहरुमा
दाग बाहेक भेट्दिन केही, जूनका तस्बिरहरुमा

बिरासीला लाग्छन् हिजोआज, सुगम सङ्गित पनि
उनका मुहार मात्रै आउंछन्, धुनका तस्बिरहरुमा

मौनतामा मुस्कुराएको हुन्छ, त्यो दर्पणपनि आज
रङ्ग उँडेकै हुन्छन् हिरामोती, सुनका तस्बिरहरुमा

kuro

नचाहेर नै आउन थाले हिजोका ति यादहरु
कतै मिठा कतै तिता मिलनका ति रातहरु

सम्झेर नै काउकुती के'के भए त्यही बेला
गुन्जिदै छन् आज अस्तिका ति सम्बादहरु

मदहोशीका ईशारामा बेहोशीका पाइला मेरा
कसैगरी रोकिएनन् ती जवानीका उन्मादहरु

न रोक्यो दुरीले न त रोके बन्धनहरुले नै
स्विकार्नेछौं मिली दुनियाँका तिखा बातहरु 

हर गल्ती स्विकारीए बत्ती निभ्दा अन्धेरिमा
किनफेरी आफ्नै लाग्छन् जवानीका बर्बादहरु 

उन्मादहरु

खै यी कस्ता उन्मादहरु
मनका कुनाकुना बाट
निस्फिक्री शुस्केराहरुमा
एकान्किका शुशेलीहरुमा
एक फरक अनुभुती अनि आभास सँगै
फुरुङ्ग छ आकाशे चङ्गा जस्तै
यो मन आज ।।
सम्हालिदा सम्हालिदै पनि
बेहोशीमा दौडिएका पाइलाहरु
बेजोड हुत्तिरहेका हुन्छन्
भावनाका छालहरु
चाहनाका किनार सम्म ।।
केही यौवनका मिठा चाहहरु सायद
अनि छातीका असहज डाहहरु सायद
सायद अन्जान शहरमा छोडेर आएका यादहरु
सायद जोवनका रहरमा छोडेर आएका यादहरु
चाहे बहानामा हुन् या चाहनामा
स्पर्श सहित या बिना स्पर्श नै
यी/ति सबै सम्झनाका तरेलीहरुमा
मन मुटु हुँदै चिप्लेटी खेल्दै छन्
यी अनौठा उन्मादहरुमा आज। 

सधैं छचल्किने, बैशालु प्याला उनका

छुँ छुँ लाग्ने, गूलाबी गाला उनका
सङ्गै हिँडु, सराबी चाला उनका 

कस्तो कशिस, उफ् त्यो मुहारमा 
अझै मोहकी, गाजल काला उनका

लुकाएकी छन् चाह, मनका दराजमा
कहाँँ होलान्?, चाबी र ताला उनका

सृङ्गार उनको मुस्कान, टिकी त्यो जून 
हेरिरहुँ लाग्ने, गलाका माला उनका

नपिएरै बेहोशी, पिए के हुन्छ कुन्नि
सधैं छचल्किने, बैशालु प्याला उनका

तिम्रा आसुँ पुच्छु भन्ने, यहाँ हजार भेटिन्छन्

तिम्रा आसुँ पुच्छु भन्ने, यहाँ हजार भेटिन्छन्
रगतको थाहा छैन, आँशुको बजार भेटिन्छन्

खुनले कोरिएका भेटिए, बेकारका सिमाहरु
उत्खनन् गर तराईमा, अझै पहाड भेटिन्छन्

नजानेर होला सायद, बशन्तमा फूल भेटिएन
भन्दै त थियो साथी, पतझडमा बहार भेटिन्छन्

प्यासी छु म स्वतन्त्रताको, सुख्खा नदिहरुमा
बम बारुद हतियारले भरिएका ईनार भेटिन्छन्

पर्खन्न खोलो फर्कन्न जवानी पर्खिएर बसे पनि
जिन्दगी जस्तै लमतन्न लाग्ने, किनार भेटिन्छन्

गैर बहर गजल

उनलाई छोएको बतासले छुँदा फुरुक्क हुन्छु
किन हो किन, उनी भने पछी हुरुक्क हुन्छु।। 

उमेरले नेटो काटेर, के भयो र ए! मित्र हो
कस्तो नशा अझै तस्बिर देख्दा जुरुक्क हुन्छु।।

न कहिल्यै नजर जुधे न मुस्कुराए ती ओठहरु
यो कस्तो अगाढ् प्रेम एकातर्फी धुरुक्क हुन्छु ।।

कैयौंचोटी बाटो छेकी प्रस्ताब राख्छु भन्दापनि
उनको आगमन सङ्गै, अन्तकतै लुरुक्क हुन्छु ।।
 
छाडेन साथी छाडेन, अझै जवानी उम्लनलाई
रती उन्मुक्तताको रापमा छिट्टै, भुलुक्क हुन्छु ।।

जति फराकिलो हुनुपर्ने, आकाश भएन !!

भन्दै'थियौ, मेरो मायाको आभाष भएन
सोध्छु तिमीलाई नै किन'एहशास' भएन ?!!

रहर मलाई पनि थियो, तस्बिर सजाउने
टुटेका आधार सजाउने, क्यान्भास भएन !!

सकिए जोवन सायद,यो एेना त्यसै भन्छ
लुटिएका यौवन फर्किने, कत्तिआस भएन !!

विश्वाश त दिलाएकै थिएँ, र पनि यहाँ
प्रतिफल मायाको, कहिल्यै खास भएन !!

साँघुरीए सोच, बदलिए हरेक चाहनाहरु
जति फराकिलो हुनुपर्ने, आकाश भएन !!

उड्यो जहाज, सिङ्गापुरमा ओर्लियो

भेटिन्छ लाखौं झुट, यहाँ सरकारको
जहिं-तहीं ब्रम्हलुट, यहाँ सरकारको

त्यो उखुबारीमा, कानुन नङ्ग्याईयो
महिमलाई छ छुट, यहाँ सरकारको

डन्का पिटियो, ठुलै परिवर्तन आयो
बोल्नेले भेटे बुट, यहाँ सरकारको

'लोभि र पापीको', सम्बन्ध सुध्रियो
सहमतिमा बन्यो गुट यहाँ सरकारको

घर लग्यो पहिरोले, भाषणका राहत
पिउनु छ अब घुट, यहाँ सरकारको 

कहिले शासु, कहिले बुहारीको पालो
हुँदैन कि पक्कै फुट, यहाँ सरकारको

उड्यो जहाज, सिङ्गापुरमा ओर्लियो
हेर्नुस् न मात्र लुट,यहाँ सरकारको

थाहा भएन

कसोरी सक्यौ नि, भूल्न थाहा भएन
बिर्सियौ यो याममा फूल्न थाहा भएन!!

न यादका गीत न सम्झनाका झटारा
कहिं त गयौ खै, खुल्न थाहा भएन !!

नसोध्नु थियो सोध्यौ मेरा गन्तब्यहरु
छोड्यौ सङ्ग'सङ्गै डुल्न थाहा भएन !!

सिकायौ हांस्न, खुशी हुन जीवनमा
अनी किन अन्तै झुल्यौ थाहा भएन!!

स्विकार्य छन् नियतीका खेलहरु अब
कुन कुन रङ्गसङ्ग घुल्यौ थाहा भएन!!

गाईजात्रा बिशेष

यी दल हुन् कि दलाल उस्तै लाग्छन्
हेर्दा सरकारका कमाल उस्तै लाग्छन् !!

कसलाई के भन्नु र खै नेपालमा अब
युवाका दारी र कपाल उस्तै लाग्छन् !!

बहुलाउछ नेता माईक देख्नैहुँदैन क्यार्नु 
नगरबधु र नेताका धमाल उस्तै लाग्छन्!!

आधा जनसंख्या मिडिया सम्हाल्दै यहाँ   
सोध्ने पत्रकारका सवाल उस्तै लाग्छन् !!

ढाक्दैन लाज मुखका लङौटीले साथी
हेर्नुस् फरिया र रुमाल उस्तै लाग्छन् !!

र कस्तो बैमन्स्यता थप्यो यहाँ राजनीतिले
रगत देख्दा ढकाल र हमाल उस्तै लाग्छन् !!

थप्दैजाऊ तिमीअझै, बदनामको नशा !!

कहिले नजर त, कहिले जामको नशा
थप्दैजाऊ तिमीअझै, बदनामको नशा !!

लाग्दैन डर, न धक लाग्छ हिजोआज 
पिउँदैछु हेर यहाँ, खुलेआमको नशा !!

भन्छन् जिन्दगी नै नशा हो, पिउनेहरु
देखाउ भेटिन्छ कहाँं? हरसामको नशा !!

निश्ठुरीहरु हुन्, मझधारमा छोडीजाने
रित्याई बगली सारा, छलछामको नशा !!

खै त भेट्दिन म मात, जति  पिए पनि
उसलाई चढिसक्यो, मोहरदामको नशा !!