जितेर पनि पल पलमा, हारेको मान्छे म

जितेर पनि पल पलमा, हारेको मान्छे म 

अनेकौं सपना अनेकौं रहर, मारेको मान्छे म!! 

खै कसले के सुनाएछ कुन्नि, सुन्दैन देउताले 
नजिक पुग्दा भाग्यले पनि, टारेको मान्छे म!!

आङ्गनका खुशी बलेसीमा, अल-पत्रै पारेर 
त्यै खुशी खोज्न दुनियाँसारा, चारेको मान्छे म!!

उडेको हुन्छु पखेटा फिजाई स्वतन्त्र छु भनि
घरिघरी समयले नै जालमा, पारेको मान्छे म!!

कर्मको लेखो भाग्यको टेको, भेटिन कतै नि
जीउँदै छँदा आफन्तले जुठो, बारेको मान्छे म!!
----------
९ अगस्ट,२०२२ 
रेक्याभिक,आईसल्याण्ड  

फस्ल्याङ्ग फुस्लुङ्गमै कुरा फुस्कियो

नहुनु थियो उनी सङ्ग, प्यार भयो 
जे नहुनु थियो त्यही बारबार् भयो !!

खै यो कस्तो मायाको मौसम पनि 
एता पतझड,,, उता बहार भयो !!

ओठ टोकेर बोल्छिन जिब्रो चलाई 
घरिघरी हाम्रा दुई नजर चार भयो !!

मज्जा उस्तै पढ्दा पूराना प्रेम-पत्र
मज्जा आउने के ईमोमा कुरा गर्न 

त्यही निहुँमा मेरीको केरकार भयो !!

फस्ल्याङ्ग फुस्लुङ्गमै कुरा फुस्कियो 
आखिर पिउनु पनि, बेकार भयो !!

उ उँडे सपनाहरु, न रात न निन्द्रा आफ्ना भए

के दोश यी दुई नयनलाई, आँसु थाम्न सकेनन् 
आफ्नै हत्केलाले भिजेका, गाला छाम्न सकेनन् !!
 
दुख्ने छाती, चस्कने मन, भन्छन् रुने आँखाहरु 
रुने आँखाहरुले आँसुलाई, आफ्नो मान्न सकेनन् !!

निकै पवित्र हुन्छ माया अरे, लेख्नेहरुले लेखे त
दौलत चाहनेले त्यही माया, चोखो ठान्न सकेनन् !!

निक्कै बिरानो लाग्छन् किन, यादका आङ्गन पनि 
के झुट के सत्य देख्दा उस्तै, मन्ले छान्न सकेनन्!!

उ उँडे सपनाहरु, न रात न निन्द्रा आफ्ना भए  
सम्झना यादका डोरी समेटी, सारा बान्न सकेनन्!!

थाहै नपाई गजलकार बनेछु, बातै बातमा लेखिदिन्छु

थाहै नपाई गजलकार बनेछु, बातै बातमा लेखिदिन्छु 
पढिदिने कोई भैदिए सारा, कोमल पातमा लेखिदिन्छु!! 

पढेर त हुँदै होईन, परेरनै त होला सायद जिन्दगीमा 
दिनहरुले कसलाई पुग्छ र, अन्धेरी रातमा लेखिदिन्छु !!

पटपट फुटे यी प्रेमका गराहरु, मायालुका बादल छैनन् 

भिज्नुको मज्जा झरीमा हुन्छ, भन्दै बर्षातमा लेखिदिन्छु!!

आँसुका मसी यी औंला चलिरहन्छन्, मनका शब्दहरु 
दिन्छन् भने सडकका, हर-कोहिका हातमा लेखिदिन्छु !!

धोकाधडीकै जमाना छ हजुर, यो आफन्तले जान्दैन  
पिरती मिल्लान् नमिल्लान्, घातप्रतिघातमा लेखिदिन्छु !!

सकिएछ 'आफन्त'को बाँच्ने,चाहत जिन्दगीको!! sent to gazalganga radio nepal

चङ्गा बनाई उँडाई दिउँ कि, कागज जिन्दगीको 
सुन्यमा छ असार मसान्तमा, लागत जिन्दगीको !!

निकै कमजोर अनुभूति, सपनाहरुले साथ छोडे 
केले लुट्योलुट्यो कता छुट्यो, तागत जिन्दगीको !! 

बैरी लागे जस्तै हुन्छ अभाव मात्र खट्किए यहाँ 
आधा बाटोमा खोसिए सारा,, राहत जिन्दगीको !!

ढुङ्गा माथि परेको बिऊ, खडेरीलाई नासो जस्तो 
कसले सुन्ने कसले बुझ्ने मेरा, आहत जिन्दगीको !!

कुँडिएको मन उस्तै, उस्तै यी दिनहरु धमिलिए 
सकिएछ 'आफन्त'को बाँच्ने,चाहत जिन्दगीको!! 

गजल-भन्थे जे खोज्यो त्यही पाईन्छ अरे शहरमा

भन्थे जे खोज्यो त्यही पाईन्छ अरे शहरमा 

खै त कहाँ गाउँको पिरो, अकबरे शहरमा !!

गाजलु नयन पाईए, टोकेका गूलाबी ओठ 

भेटिन मैले पिउनमिल्ने ठाडो खहरे शहरमा !!

स्याउ जस्तै गाला देखें ती ठूलाठूला भोगटे 

भेटिन, बान्की परेको चुल्ठा लहरे शहरमा !!

मासु मात्र खान्छन् कि क्या हो शहरीयाले 

जताततै बधशाला मात्रै अनी बगरे शहरमा!! 

मरी गए फोन उठाएन, आउँदा पसे भन्थे 

एतै बसाई सरेका'थे हाम्रै ठूलाघरे शहरमा!!  

पागल बनायो त्यो रूपले मलाई

पागल बनायो त्यो रूपले मलाई

मलाई पागल बनायो त्यो रूपले 

निधारमा छ रातो, आँखामा कालो 

कसले बनायो टिका 

कसले बनायो गाजल 

मलाई पागल बनायो त्यो गाजलले 

त्यो गाजलले मलाई पागल बनायो

कहिले घुम्टो ओढेर, कहिले आँचल ओढेर 

कसले बनायो घुम्टो 

कसले बनायो आँचल 

पागल बनायो त्यो आँचलले मलाई

मलाई पागल बनायो त्यो आँचलले 

पाउजुको झन्कार मीठो, मादलको घिन्ताङ्ग मीठो 

कसले बनायो पाउजु 

कसले बनायो मादल 

पागल बनायो त्यो मादलले मलाई

मलाई पागल बनायो त्यो मादलले

पागल बनायो त्यो रूपले मलाई

मलाई पागल बनायो त्यो रूपले 

  

बेचेर सपना ३

भूल्न भन्दै बजारमा, मैले याद किनेको छु 
यादै-यादको भूमरीमा, उन्माद किनेको छु!!
  
व्याख्या धेरै गरे मान्छेले, जिन्दगीको यहाँ 
जिन्दगी धितो राखी, आर्तनाद किनेको छु !!

नउँडाउ परेवा, नलेख कविता स्वतन्त्रताको 
पिँजडामा पाईला राख्दै,आजाद किनेको छु!!

रात आफ्नै, मात आफ्नै, याद तिम्रा हरपल 
देउ'अझै सकेजति अन्धेरी, चाँद किनेको छु!!   

बर्बादीको पार्टी खोलें, एही पिरतीको नाममा  
आउ लगाउ नारासँगै, जिन्दा'बाद किनेको छु !!

edt required

सुटुक्कै चोरुँ लाग्ने ओठका लालीहरु 
भुतुक्कै पार्ने ती आँखाका बार्दलीहरु 

कसम, जवानीले ठाउँँ छोड्यो साथी 
कुटुक्कै मन खाने, कानका बालीहरु 

मसी बनाई सौन्दर्यताको कसी कस्नेछु 
खुसुक्कै देउन नयन कोशका कालीहरु 

भमरा पल्किए यहाँ फूल जुठो पार्दै 
निथ्रुक्कै पारे मेरा मनका डालीहरु 

मुसुक्कै मिठा  तिम्रा बोलिका गालीहरु 

बेचर सपना - २

मौनताले बोल्थे सधैं, ती नजरका पिडाहरु 
जहाँजहाँ हुन्थ्यौ तिमी,ती शहरका पिडाहरु!!
 
किनार सम्म आई, मझधार पछ्याउने   
कसले पो बुझ्ने यहाँ, ती लहरका पिडाहरु!!

गुमसुम् गुमसुम् गोधुली, मीठामीठा अन्धेरीमा  
कहाँ गए लाली यौवन, ती अधरका पिडाहरु!!  

खरानी समेत छैन, जहाँ तिम्रो लास जल्यो 
घाट पखाल्ने आफन्त, ती बगरका पिडाहरु!!

कसरी गयो शास तिम्रो, मनमा मेरा तस्विर 
महशुस गर्न मन भो, ती जहरका पिडाहरु !! 

त्यो निधारमा रातो टीका, खुलेको देख्दा

त्यो निधारमा रातो टीका, खुलेको देख्दा
झस्कन्छु जानुपर्ने गन्तब्य, भूलेको देख्दा

हर कहिँ कहाँ भेटिन्छन् र, प्रेमका फूल 
लाग्छ तिनै मुस्कान गूलाब्,फूलेको देख्दा

ती लाजका झुकावहरु,,  चन्चल् नयन
सम्झन्छु मङ्गसिरमा धान्, झुलेको देख्दा

शान्त सालीन सौन्दर्यमा गालाका लाली 
ती ईन्द्रेणीमा रङ्गहरु,,, घुलेको देख्दा 

मार्दिउँ जस्तै हुन्छ मलाई, पत्थर टिपी 
उनका घर वर केटाहरु, डुलेको देख्दा